З.Энхболд намаа хайрцаглаж чадсангүй

Ардчилсан намын даргаар З.Энхболд сонгодсоноос хойш анх удаа ҮЗХ-гоо нэгдүгээр сарын 20-ны 17.00 цагт хуралдуулахаар товоо зарласан ч, харамсалтай нь түүнийг тоож Төрийн ордонд цугларсан нь 40 гаруйхан хүн байлаа. Энэ бол түүний хувьд АН-ынхандаа тоогдсон эсэхээ тодорхойлох нөгөө талаар өөрийгөө хэн бэ гэдгээ сорих сорилт нь байв. 

 

УИХ-ын дарга, АН-ын дарга З.Энхболд генсек-ийн үүрэг гүйцэтгэгч Л.Эрхэмбаяртайгаа, бас "Шонхор”-ынхонтойгоо, УИХ-ын гишүүн Х.Баттулга МоАХ-ныхонтойгоо бүтэн нэг цаг хүлээсэн ч бусад фракц буюу "Нэг ардчилал”, "Алтангадас”, "МҮДН”, "Чандмань”, "Кроун”-ынхан хүрэлцэн ирсэнгүй. Тус намын ҮЗХ нийтдээ 228 гишүүнтэй. Түүнээс 40 гаруй нь хуралдаанд ирж, бусад нь З.Энхболдын илгээсэн урилгыг хүлээж аваагүйг харахад өнгөрсөн хугацаанд хаан ч юм шиг, заан ч юм шиг загнаж ирсэн түүний нэр хүнд намдаа ямар байгааг илүү дутуу үггүйгээр харуулсан үйл явдал болж өнгөрлөө гэж хэлэхэд буруудахгүй биз.

Хэдийгээр З.Энхболд, Л.Эрхэмбаяр нарын зүгээс өөрсдөд нь үзүүлж байгаа ҮЗХ-ны "бойкот”-ыг "ҮЗХ-ны хурлаас илүү Засгийн асуудал чухал байна” гэдэг үгээр халхавчилж буй ч анхны хуралдааныг товлосон хугацаандаа хуралдуулж чадаагүй нь тэд намдаа өнөөг хүртэл үнэлэгдэж чадсангүй гэсэн үг. Өнгөрсөн нэг жилийн хугацаанд "хаан” мэт загнаж ирсэн түүний зангараг ердөө ийм л байлаа. ҮЗХ-ны хуралдаанаа зарлаж өдөржингөө хүлээсэн дарга түүнээс өөр хэн байсан юм бэ.

Өөрөөр хэлбэл, ҮЗХ-ны гишүүд нь цугларахгүй байна гэдэг нь өөрийг нь хэн бэ гэдгийг л харуулсан, магадгүй түүний энэ албан тушаалдаа тэнцэхгүй

Өнгөрсөн нэг жилийн хугацаанд өөрийгөө "хатуу самар”-т тооцож, намынхнаа "Шонхор”-дож явсан тэр өнөөдөр ийм эвгүй мэдрэмж, доромж байдлыг амсана чинээ тооцоогүй явсан биз. Тэгэхээр энэ бүгдэд тэр өөрөө л буруутай. Намынхнаа үргэлж доош хийж "Намайг хэн хэлэх юм бэ” гэсэн аятай өнгөрсөн хугацаанд өөрийгөө хэт дөвийлгөж үнэлсэнийхээ хариуд нь ҮЗХ-ны гишүүд нь түүнд "Чи битгий хуц аа” л гэдгээ чимээгүй бөгөөд хатуухан байдлаар илэрхийлсэн илэрхийлэл нь энэ шүү дээ.

Эндээс З.Энхболдод өөрийнх нь үүсгэн байгуулсан "Шонхор”, үй зайгүй анд болох Х.Баттулгаас нь өөр өмөөрөх, өөрийг нь дэмжих баг алга гэсэн дүгнэлт хийхэд буруудахгүй биз. Үнэндээ ҮЗХ-ны хурлаас илүү Засгийн асуудал чухал байсан юм бол Засгийн газрыг огцруулах хүсэлтийг албан ёсоор өргөн барьсан Мягмар /2016.01.19/ гаригт хуралдааныхаа товыг цуцлах, үгүйдээ л ядаж өөрийгөө ийм байдалд оруулахгүйгээр "аварч” болох арга түүнд байсан.

ҮЗХ-ны хуралдааны өмнөхөн Ч.Сайханбилэгийг огцруулах саналыг өргөн барьсан Монгол Ардын намын зүгээс Ардчилсан намд өгч байгаа илгээмж бус Ардчилсан намын зүгээс "Алтангадас”-т өгч байгаа анхааруулга байсан уу гэдгийг хэлэхэд хэцүү. Гэвч өчигдрийн үйл явдлаас харахад ҮЗХ-ны хуралдаанд "Алтангадас”-ынхан хамраа ч цухайлгаагүйг бодоход асуудал Г.Уянгад биш З.Энхболдод байсан юм биш байгаа гэсэн хардлагыг улам бататгаж байна. 

"Овоо босгоогүй бол шаазгай хаанаас суух вэ” гэгчээр Ч.Сайханбилэгийг С.Эрдэнээр солино гэсэн эртний яриа энэ удаад дахин сөхөгдөж байгаагийн учир шалтгаан бас сонирхол татна.

Хэдийгээр тэрбээр өнгөрсөн хугацаанд хүссэнээрээ ярьж, хүссэнээрээ тоглосон ч өчигдрийн ҮЗХ-ны хурал түүнийг АН-ынхандаа хүндлэгдэх нь байтугай үнэлэгдэж чадаагүйг , мөн ҮЗХ-ны дэмжлэгээ аваагүй тэр Их хурлынхаа дэмжлэгийг авах эрх мэдэлтэн болоогүйг л өөрт нь мэдрүүлсэн байгаасай гэж найдъя.

Өөрөөр хэлбэл, АН-ын Ерөнхиий нарын бичгийн даргын үүрэг гүйцэтгэгчээр жил шахам ажиллаж байгаа Л.Эрхэмбаяр ч тэр, З.Энхболд ч тэр аль, аль нь АН-ыг зангидаад авч явах хүмүүс мөн үү гэсэн асуулттай л үлдэж байх шиг. 

У.СЭРГЭЛЭН

 

Мэдээг хэвлэх

Сэтгэгдэл:

Нэр:*
И-мэйл:
Сэтгэгдэл:
Ustulina 19 July 2018 07:45 185.156.174.220
Good day! Please note a good offering for you. http://bit.ly/2JW99VX

Зорхиогчийн эрх хуулиар хамгаалагдсан. Мэдээлэл хуулбарлах хориотой.